Hit And Run A Goodlands: Belfi Viktim-la “Mo Belmer Dan L’eta Kritik EK Mo Dimann Lepep Prie Pou Li”

Loading...

Shobha Mudhoo, 65 an, ti tap avek enn masinn Lindi le 30 Zanvie ver 19hr45 lo larout prinsipal a Goodlands. Sa abitant mem rezion ti pe sorti mandir. Linn admet Intensive Care Unit ek so l’eta la sante kritik.

Shobha Mudhoo ti kit so lakaz ver 18hr pou al mandir lokalite. Dapre bann temwin, enn loto blan mark Toyota inn tap avek li kan li ti pe marse. Sofer-la pann arete. Viktim-la inn blese grav ek inn transport li a lopital SSRN a Pamplemousses kot linn admet dan swin intansif. Linn fer enn operasion ek li tjr dan koma. Li lo respiratwar artifisiel.

Lapolis Goodlands inn vizionn bann zimaz lo kamera surveyans la rezion me zot pa bon kalite akoz move letan. Dapre enn temwin ki ti pre kot enn laboutik, loto la ti pe roul extra vit ek li pann resi not nimero plak loto.

“Loto la finn tap avek madam la e li finn al bien vit. Lapli osi ti pe tonbe e la route pa ti kler e mo pa finn remark nimero plak,” li afirme. Dapre li, ti ena enn pasaze dan loto-la. Lapolis pe resers bann lezot temwin aksidan-la.

Meera, 29 an, belfi Shobha Mudhoo, pann kasiet so koler. “L’eta la sante mo belmer kritik ek linn perdi boukou disan. Si sofer-la ti arete e ti amenn mo belmer lopital, li pa ti pou perdi sa kantite disan-la. Li inaksepotab saki sofer-la inn fer ek nou pa pou kapav pardonn li. Mo belmer enn dimounn trankil ek dous ek li ti ena labitid al mandir. Li touzour pridant lo larout,” li dir.

Li azoute ki so boper dan sok apre sa aksidan-la. “Mo boper atriste me li pa pe montre nou. Tou fami boulverse. Mo swete ki mo belmer gueri pli vit posib. Mo dimann bann otomobilist fer boukou atansion lo larout akoz move letan. Ek mo dimann lepep Morisien prie pou mo belmer,” li azoute.

Bann anketer pe travay dur pou rod koupab-la. L’anket, mene par serzan Karmally, plase lo supervizion inspekter Gunga.

Comments

comments