Trèfles, Rose-Hill: L’ADSU Aret Enn Adolesan 14 An Avek 76 Gram Sintetik

Loading...

Konsta la akablan: bann dealers la pe vinn depli anpli zen. Zedi, koumansman lasware, inn fer enn lafouy lo enn adolesan 14 an dan Résidence Trèfles, Rose-Hill ek lekip Anti-Drug and Smuggling Unit (ADSU) inn sezi 12 doz ladrog sintetik, antou 76 gram, ek enn som Rs 4700. Zot soupsone ki sa larzan la inn gengne avek lavant sa ladrog la.

Se enn tigit avan 18hr ki adolesan la finn interpele par enn lekip l’ADSU, dirize par serzan Ramkeelawon dan lari Haendel, Résidence Trèfles, Rose-Hill, Zedi le 18 Mai. Bann eleman brigad antidrog finn gengn informasyon ki sa zen zom la pe livre ladrog dan landrwa. Sispe la finn kondwir dan buro ladsu Rose-Hill pou interogatwar.

Adolesan la finn kondwir divan tribunal Rose-Hill yer gramatin, kot enn akizasyon provizwar trafik ladrog peze kont li. Li mintenu dan selil polisiyer ek finn anvway li dan sant detansyon pou miner dan Petite-Rivière.

Touzour Zedi, enn tigit avan midi, dan simin avenue La Confiance, Résidence Kennedy, Quatre-Bornes, enn lekip l’ADSU, mene par inspekter Rajeev Subba Reddi, inn prosed a larestasyon Jessigen Dalingum Bablee, 28 an. Sa plonbie la, abitan Port-Louis, ti ena 13 doz eroinn dan so posesyon, antou 1,3 gram, apre enn som larzan Rs 600, ki soupsone linn gengne apre lavant sa ladrog la. Li finn prezante divan tribunal Rose-Hill yer.

Mem zour ankor, ver 20hr, Kavish Naikoo, 19 an, ki abit la Route Palma, Quatre-Bornes, finn arete dan Flic-en-Flac. Li ti ena 20 gram ladrog sintetik avek li. Li finn tradwir divan tribunal Bambous yer.

Sa trwa sispe la finn plase an detansyon apre lord asistan surintandan lapolis Suran Vurdah, responsab ladsu divizyon louest.

Comments

comments