[Video] Grand-Baie: Enn Voler Bez Enn Anplwaye Kout Sab Dan Enn Filling

Loading...

Zot inn sap bien lwin.

Trwa anplwaye enn filling dan Grand-Baie, ki ti an servis gramatin boner, Lindi le 22 Mai, finn gengn enn vol par de voler ankagoule. Enn parmi bann anplwaye la inn blese lo lamin. Inn fer enn depozisyon stasyon lapolis Grand-Baie.

Tousala inn deroule Lindi ver 02hr15. Sa inn pase dan fraksyon segonn. Lo bann zimaz kamera surveyans ki finn fourni par Accent Solution, nou kapav trouve ki enn anplwaye, ki finn interpele par bann tapaz andeor filling, sorti pou guet sitiasyon. Nou trouv de zom, avek zot vizaz maske. Premie la inn pran enn hache enn pied-de-biche tandi ki lot la inn arme avek enn sab.

Video:

Saki ena pied-de-biche ek hache la zet lo enn anplwaye ek tren li andan filling la. “Pa sove sinon pou bat zot,” voler la inn dir zot. Avek so pied-de-biche la, linn esay defons lakes me li pann resi. Alors linn demann enn parmi bann anplwaye la pou ouver li me li pann rod ouver ek inn montre rezistans. Malfeter la inn donn li enn kou lo so lipie.

Antretan, deziem konplis la inn fer irupsyon avek enn trwaziem anplwaye. Li ti arme avek enn sab ek linn bless li lo so lamin. Kan linn remarke ki li pa pou kapav kokin larzan ki dan lakes, bann malfra la inn sove. Zot inn resi kokin portab ek portfey kesie la.

Butin ki zot inn anporte estime a Rs 12 000. Anplwaye ki finn blese inn resevwar bann swin dan lopital SSRN, Pamplemousses. Li finn answit otorize pou rant kot li. Bann limie Criminal Investigation Division Grand-Baie pe ankor rod bann malfeter la.

Comments

comments