Vacoas: Jeshina, 13 An, Dir “3 Garson La Inn Viol Mwa Saken So Tour”

Enn adolesant, Jeshina ek 13 an, afirme ki li finn agrese sexuelman par plizir garson pli gran ki li. Lapolis inn resi aret zot me zot dir ki sa pa finn deroule.

Enn kolezyenn 13 an ki ress dan Plaines-Wilhems, aktuelman admet dan lopital Victoria dan Candos. Adolesant la afirme ki li finn agrese sexuelman par trwa adolesan Mardi apremidi dan Vacoas. Lapolis inn prosed a larestasyon bann zen sispe la.

Se medsin servis lopital ki finn inform lapolis sa agresyon la. Dan so plint, viktim la indike ki enn an desela linn fer konesans enn adolesan 16 an a traver Facebook.

Zot inn koumans kominike souvan ek finn zwen 2-3 fwa. Dapre kolezyenn la, garson la ti vinn guet li de kou. Zot inn gengn relasyon intim pre kot enn sant komunoter.

Mardi le 13 Juin, ver 15hr, viktim la ti pe al lakaz kan so lekol inn fini. Li finn explik lapolis ki li finn rankontre adolesan laa lo larout. Apre enn ti koze, garson la inn pran so portab.

“Li finn rass sa depi mo lamin. Kan monn dir li rann mwa mo portab, linn propoz mwa pou gengn relasyon pou retourn portab la,” li afirme dan so plint. Li avoue ki linn fer saki garson la inn dir. Me enn ti letan apre, li explike ki de adolesan inn vini.

“Se garson la so bann kamarad. Zot inn abuz mwa saken so tour avan sove,” viktim la azoute. Li finn kasiet apre sa paski linn kwar ki banla inn al kriye lezot garson. Li finn answit al so lakaz ek inn rakont tou so mama ki finn inform Child Development Unit (CDU).

Finn kondwir adolesant la a lopital kot linn admet. Lapolis Vacoas inn pran sarz sa lanket la ek inn prosed a larestasyon sa trwa zen garson la Merkredi. Zot inn dir ki zot pa finn agress viktim la sexuelman. Zot ti akonpanie par zot paran ek zot dir ki viktim la ti konsantant.

Comments

comments