Li Porte Disparu Depi Mardi: Retrouv Lekor Poonith Jeetun Dan Lak Grand-Bassin

Li ti pe souvan al prie dan bor sa bassin sakre-la ek li pa ti pe doute ki li pou pouss so dernie soupir laba.

Poonith Jeetun, 77 an, ti porte disparu depi Mardi le 5 Septam. Lekor sa abitan Gros-Billot-la finn repese par National Coast Guard (NCG) yer, Merkredi le 6 Septam, dan lak Grand-Bassin.

Kadav-la finn transporte lopital Victoria, Candos pou fer otopsi par Dr Sudesh Kumar Gungadin. Ver 23hr, Mardi, enn parmi garson viktim-la inn sinial so disparisyon stasyon lapolis Rose-Belle.

So landimin, enn foto Poonith Jeetun finn remet a lapolis pou zot kapav difuz li.

So garson finn answit al Hindu Maha Sabha ki trouv Grand-Bassin, apre ki linn aprann so papa ti al laba. Vizyonaz kamera surveyans inn permet li pou idantifie li. Li finn diriz li mem ver lak-la.

Alos NCG finn mont enn operasyon ek bann polisie Rose-Belle osi ti prezan mene par inspekter Khemrazdev Joyeprakash. Ti osi ena Divisional Support Unit ek Emergency Response Service. Lanket pe kontinie dan sa zafer-la.

Comments

comments