Lamor Allan Christophe Bulluck: Lapolis Lo Lapist 2 Sispe

Li ti depoze lopital lenor avan bann saki ti depoz li sove ale. De individu dan kolimater lapolis apre lamor sispe Allan Christophe Bulluck.

Dese sa abitan Péreybère-la, ki ena 23 an, finn konstate par bann medsin kouma linn ariv lopital dan Pamplemousses, Samdi le 16 Septam 2017.

Lotopsi ki finn pratike par medsin lezist lapolis, Dr Maxwell Monvoisin, inn atribue so dese a enn oedem pulmoner. Rapor-la rekomann enn lanket aprofondi ek zot soupsonn enn akt malveyan (foul play).

Criminal Investigation Division Grand-Baie finn pran sa zafer-la dan zot lamin ek pe rod de sispe.

Bann zimaz kamera surveyans lopital finn vizyone. Bann anketer pa ekart enn zafer ladrog ki a lorizinn sa dram-la.

De zot kote, bann pros zen zom-la pe interoz lo sirkonstans sa dram-la. Narayanee Bulluck, so granmer, afirme ki li ti enn zen zom san zistwar. “Zame linn gengn problem avek kiken. Se pa enn dimoun ki violan.”

Li dayer ankor dan enn gran sok. Se bann polisie ki finn anons li lamor so ti garson, Samdi le 16 Septam, ek finn dir li ki ena dilo dan so poumon.

“Kapav dimoun inn pran li, inn plonz li dan enn barik delo,” fam 68 an-la indike ki li finn elve  Allan Christophe Bulluck depi ki li tipti.

Zen zom-la ti pe viv separe avek so madam, avek ki li ena enn garson 3 an. Mama viktim-la, Marie Laurena Bulluck, 48 an, rakonte ki malgre bann problem avek so fam, li ti kontan so zanfan ek ti pe byin pran so swin.

Dayer, Zedi le 14 Septam, li finn dir li ki li anvi al guet so zanfan. “Nou pa kone si li finn gengn enn problem kan li finn al laba,” mama-la konfie.

Mama zen zom-la azoute ki so garson ti pou rant travay dan enn sosiete netwayaz. Bann funeray ze zom-la inn fer Dimans le 17 Septam.

Comments

comments