Port-Louis: Mohammad Osman, 19 An, Pous Enn Polisie Ek Rod Kraz Li Avek So Motosiklet

Sa sen-la inn sok plizir dimoun dan lari SSR dan Port-Louis yer, Merkredi le 1er Novam. Arete pou enn kontrol routinn, enn motosiklist inn bouskil enn polisie avan esay kraz li avek so motosiklet.

Li finn alos metrize par de koleg polisie-la. Zom ki ti asiz par deryer inn sove tandik Mohammad Osman inn kondwir stasyon lapolis Fanfaron. Konstab Badoorally, ki finn blese lo so tibia, inn kondwir lopital Jeetoo pou donn li bann swin neseser.

Se ver 11hr30 le 1er Novam ki tousala inn deroule. Bann konstab Badoorally, Soubratty ek Doolooa ti pe fer enn patrouy dan enn fourgonet dan bann lari Port-Louis.

Kan zot inn ariv pre avek munisipalite Port-Louis, zot atansyon inn atire par enn motosiklist. Motosiklet-la inn depas zot fourgonet dan enn vakarn infernal ki sorti so tiyo esapman.

Bann polisie-la inn dir li arete. Motosiklet-la inn ralanti ek borde kan kwin larout. Kan konstab-la inn demann li so permi kondwir, li pa finn reponn li.

Sa ler lamem linn fons lo polisie-la avek so motosiklet. Dan sa aksyon-la, linn prozekte anba. Motosiklist-la, enn denome Mohammad Osman Peerbux, ki enn ed sofer 19 an, finn arete par lapolis.

Comments

comments