Aksidan Fatal Lallmatie: “Monn perdi mo chacha akoz inpridans enn polisie”

Riteshwar Oochit, 44 an, inn konn enn lafin trazik dan lasware Zedi le 16 Novam. Sa abitan Lallmatie, ki enn infirme lopital Flacq, ti pe retourn depi travay kan linn ranverse par enn loto Branch Road lokalite. Sofer loto-la enn polisie, 27 an ek afekte Special Suipport Unit.

Viktim-la inn transporte an irzans lopital kot so bann koleg inn konstat so dese.

Bann manb lafami Oochit, ki abit Mission Cross Road, Lallmatie, zot akable par sa evenman-la. “Mo dadi ena labitid atan retour mo chacha. Li dan enn gran sok. Li finn rant dan enn silans konple paret kouma mo chachi,” nies Riteshwar Oochit konfie, ki ena 26 an.

Bann sirkonstans dan lakel viktim-la inn perdi lavi fer so bann pros revolte. “Noun perdi li par inpridans enn polisie,” zot dir. Riteshwar Oochit les deryer li de zanfan.

Tandi polisie-la, linn fer enn lalkol test kinn revel negatif. Linn tradwir divan tribunal Flacq azordi, Vandredi le 17 Novam. Li fer obze enn sarz provizwar pou omisid involonter. Lanket lapolis pe kontinie.

Loading...

Comments

comments