Insandi Shoprite: Lekip SMF Retrouv Lekor Karbonize Dinesh Domah

Ti ena enn insandi ki ti eklate Dimans dernie le 12 Novam dan Shoprite, Trianon, ver 17hr30.

Special Mobile Force inn retrouv enn kadav, anseveli anba bann debri azordi, Dimans le 19 Novam. ACP Dip inn konfirme ki se lekor Dinesh Domah. Lekor zen zom-la ti reserse depi ki sa insandi-la inn eklate.

Bann manb Scene of Crime Office atandu sur plas pou efektue bann prelevman.

“Lekor-la ti fer fas anba. Kadav-la touzour dan antrepo. Li idantifiab,” enn ofisie SMF explike. Lekor viktim-la pou transporte lopital Victoria, dan Candos, pou fer otopsi.

Bann ponpie ek SMF ti pe rod lekor Dinesh Domah depi enn semen. Zen zom 24 an-la, anplwaye Shoprite ti apersu pou dernie fwa Dimans le 12 Novam, dan antrepo kan li ti pe al sers so lakle. Bann ponpie ek Special Mobile Force ti pe travay dur depi koumansman lasemen pou retrouv li.

Bann solda dife ti resi teign dife apre pli ki trwa zour. Sa insandi-la inn fer plis ki 250 tonn debri. Bann anplwaye Shoprite ti mande sur plas pou retir bann debri.

Comments

comments