Nwayad Cascade Savanee: Jay Nwaye Apre Enn Plonze Dan Basin

“Li mem ki ti pe fer nou gengn riye dan lakaz,” so bann pros dir avek larm dan lizie. Me Jay Useree, 14 an, pou nepli kapav partaz lazwa viv avek bann-la. Yer, Zedi le 30 Novam, lekor san lavi sa adolesan-la inn repese depi Cascade Savanne, Souillac.

Miner-la, ki abit St-Louis, Surinam, ti al fer enn balad laba premie fwa kan dram-la inn arive.

Inn bizin intervansyon bann eleman National Coast Guard (NCG) pou retrouv adolesan-la depi basin kaskad-la.

Li ti akonpanie avek 5 kamarad so klib karate. So mama ti inkonsolab yer. Li nepli konpran kouma so garson inn perdi lavi koumsa.

Pandan balad-la, Jay ti anvi plonze dan basin. Se koumsa mem ki linn retrouv li an difikilte apre enn moman panik.

So bann kamarad inn esay ed li me pann resi tir li depi dilo. Lapolis Souillac ek bann eleman NCG inn averti deswit. Zot inn fer enn gran operasyon pou fer so resers avan tir lekor miner-la.

Medsin lezist lapolis inn atribue dese Jay Useree a enn asfixi akoz nwayad. Viktim-la ti pe frekant lekol Imperial dan Curepipe.

Loading...

Comments

comments