Aksidan Fatal Pereybère: Sofer Bis “Motosiklist-la ti pe roul extra vit”

146 mor lo nou larout. Non Harley Riley inn azout lo lalist bann personn kinn perdi lavi dan bann aksidan larout.

Sa ex-direkter informatik-la, ki ti ena 46 an ek dorizinn sud-africaine, ti pe travay dan enn lotel dan larezion lenor. Li ti lo so scooter Samdi ver 6hr lo larout prinsipal dan Pereybère.

Dapre informasyon preliminer, linn kit so ‘lane’ ek inn tap anplin avek bis-la. Kadav viktim-la inn transporte lamorg lopital Victoria, Candos, pou fer otopsi.

Roshan C., ki ena 36 an ek abitan Plaine-des-Papayes, inn transporte stasyon lapolis Grand-Baie. Sofer bis-la inn fer enn lalkol test kinn revel negatif. “Mo ti pe sorti Cap-Malheureux an direksyon Grand-Baie kan motosiklist-la, ki ti pe vinn full vites, inn kit so ‘lane’ ek inn tap avek bis-la violaman,” linn explik bann anketer. Apre so interogatwar, linn relase lo parol.

Lotopsi pratike par sef departman mediko legal, Dr Sudesh Kumar Gungadin ek medsin lezist Dr Prem Chamane, inn atribue dese Harley Riley swit a bann blesir multip. Apre otopsi, kadav-la inn transfere lamorg lopital SSRN, Pamplemousses, ziska pros viktim-la rant dan pey. Lanket polisiyer, plase sou soupervizyon surintandan lapolis Dawoonarain, pe kontinie.

Loading...

Comments

comments