Roche-Bois: Retrouv 55 Doz Eroinn Lo Enn Zen Zom 27 An

Zoli kou pou Anti-Drug & Smuggling Unit (ADSU) Metropolitan Division. Enn patrouy inn prosed a larestasyon enn abitan Ste-Croix dan Batterie-Cassée, Roche-Bois, yer gramatin. Sispe-la, Amjadally Fatahmamode, 27 an, inn retrouve an posesyon 55 doz eroinn. Enn akizasyon provizwar trafik ladrog inn retenir kont li.

Se ver 11hr ki enn lekip l’ADSU inn reper Amjadally Fatahmamode ki ti pe paret lous dan Batterie-Cassée, Roche-Bois. Sa abitan Ste-Croix-la inn interpele, avan fer enn lafouy korporel lo li. Bann polisie inn dekouver 55 doz eroinn lo li.

Sispe-la inn kondwir dan kartie zeneral l’ADSU dan Casernes Centrales. Apre linn prezant divan Bail and Remand Court, kot enn akizasyon provizwar trafik ladrog inn retenir kont li. Linn mintenir dan selil polisiyer.

Ladrog sintetik ek sikotrop

Pandan lazourne Vandredi, enn lot arestasyon inn efektue dan Batterie-Cassée, Roche-Bois. Joseph Louisciano Leopold, enn anfle kamion 30 an, inn apreande apre enn red dan so lakaz. 33 doz ladrog sintetik ek 63 konprime sikotrop, pou lakel li pa ti ena preskripsyon medikal, inn dekouver kot li. Enn som Rs 2 650, ki soupsone inn gengn depi lavant ladrog, ek bann konprime inn sezi.

Joseph Louisciano Leopold inn prezante divan tribunal Port-Louis Vandredi avan plase an detansyon. Enn akizasyon trafik ladrog inn retenir kont li.

Loading...

Comments

comments