Swisid Gentilly: “Yashwan ti separe avek so fam ek ti ena problem avek so belmer”

Seri nwar kontinie. Yashwan, 27 an, inn donn li mem lamor par pandezon dan so lakaz yer, Merkredi le 6 Desam, ver 13hr30.

Dapre nou bann informasyon, sa abitan Gentilly, Moka-la, inn komet ireparab akoz li ti ena bann problem familial. Dapre enn manb lafami, li dir ki Yashwan so madam ti separe avek li. Ek so belmer ti pe kontinie fatig so latet ziska linn plin avek sa bann zistwar-la.

Bann pros viktim-la inn alert lapolis Moka kouma zot inn fer sa dekouvert makab-la. Criminal Investigation Division (CID) Moka apre SAMU inn mande sur plas pou fer enn konstat.

Bann medsin inn konfirm dese zen zom-la. Zot inn transport lekor viktim-la lamorg pou fer enn otopsi. Dapre rapor otopsi-la, Yashwan inn mor swit a enn asfixi akoz pandezon.

Funeray Yashwan inn fer azordi, Zedi le 7 Desam, ver 11hr gramatin. Lapolis Moka inn ouver enn lanket.

Comments

comments