Veer Luchoomun: “Mo pa ti kone monn tap avek kiken”

Patron Baron Games inn revinn lo plas aksidan dan Forbach. Veer Luchoomun ti mortelman tap avek enn motosiklist, Keshava Appadoo, le 3 Desam. Linn partisip dan enn rekonstitusyon de-fe yer apremidi, Vandredi le 8 Desam.

Frer depite Sandhya Boygah ek neve minist Leela Devi Dookun-Luchoomun inn explik bann anketer ki li pann trouv motosiklet ki ti pe roul divan li. “Se apre ki monn tap avek kitsoz ek ki airbag inn deklanse ki monn realize monn fer enn aksidan. Monn arete ek kan monn desann depi loto, monn trouv enn motosiklet ek enn dimoun lo koltar.”

Veer Luchoomun, kinn teste pozitif pou lalkol test, inn rakont bann polisie bann sirkonstans sa aksidan-la dan prezans so avoka, Me Steven Sauhoboa. Linn soulinie li pann trouv deziem dimoun apre aksidan-la.

Veer Luchoomun, ki reponn enn akizasyon provizwar omisid involonter, inn gengn liberte kondisyonel apre ki linn fourni enn kosyon Rs 12 000 divan tribunal Pamplemousses. Dan so depozisyon stasyon lapolis Piton, linn indike ki motosiklist-la pa ti ena zile fluoresan lo li.

Par ayer, Veer Luchoomun inn rekonet koupab pou posesyon gandia avek lintansyon pou distribue dan lakour intermediyer yer. Li ti arete Rivière-du-Rempart, an 2011, pou posesyon 10,3 gram gandia disimule dan enn sak plastik.

Comments

comments