Saint-Pierre: Kelvy Lutchigadoo 23 An Arete Par L’adsu Pou Trafik Ladrog Sintetik

Anti Drug and Smuggling Unit (Adsu) inn prosed a larestasyon Kelvy Lutchigadoo dan lapremidi Vandredi le 8 Desam. Se pandan enn operasyon par ladsu dan zafer inportasyon 329 gram ladrog sintetik.

Sa abitan Saint-Pierre-la ti reserse depi 20 zour, apre ki linn sove pandan enn lexersis Controlled Delivery Lindi le 20 Novam dan Reduit. Dan lazourne Samdi le 9 Desam, sispe-la inn tradwir divan Bail and Remand Court (BRC). Enn sarz provizwar trafik ladrog inn loze kont li.

Se dan lazourne Dimans le 29 Novam ki 329 gram ladrog sintetik, estime a Rs 490 000, ti dekouver dan enn kolis, ki sorti La France, dan aeropor Plaisance. Bann dwanie inn desel bann obze sispe ek inn fer kolis-la pas par Rayon-X.

Apre enn inspeksyon kolis-la, enn sase ki kontenir enn obze silindrik inn dekouver. Kan zot inn ouver li, bann ofisie ladwann inn tonb lo enn bwat ki kontenir lapoud ti bebe. Bann ofisie-la inn konstate ki zot soupson ti bon kan zot inn inspekte ki ena ladan. Bann analiz preliminer sur plas, efektue par enn kit spesyal, inn konfirm zot dout.

So landimin, savedir le 20 Novam, Kevin Chocklingum, enn premie sispe ti vinn rekuper kolis-la. Bann limie l’adsu inn prosed a so arestasyon. Pandan so interogatwar, linn denons Kelvy Lutchigadoo, kom inportater ladrog-la, ki estime a Rs 490 000. Kevin Chocklingum inn explike ki linn rann servis so kamarad Kelvy, kinn demann li pou rekuper kolis-la. L’adsu inn mont enn deziem lexersis Controlled Delivery, dan rezion Reduit.

Apre inpe minit ki zot inn ariv Reduit, Kevin Chocklingum inn trouv Lutchigadoo, kinn vini abor enn berlinn alman. Me linn fini konpran ki se enn piez ek bann limie l’adsu ti pe atann li vinn pran kolis-la. Linn sove dan so loto. Li pann ezite pou fons lo enn veyikil lapolis, ki ti pe esay blok so larout.

Kolizyon-la ti inevitab ek Kelvy Lutchigadoo inn profite pou sove. Depi sa, li ti aktivman reserse par l’adsu. Dan lapremidi Vandredi le 8 Desam, bann limie l’adsu Western Division, lo baz bann ranseignman, inn fer enn landing dan lakaz sispe-la ki trouv Saint-Pierre. Sa etudian 23 an-la inn arete ek plase an detansyon. So interogatwar pou koumanse semen prosin.

Loading...

Comments

comments