Rivière-du-Rempart: So Mari Ras So Seve Akoz Li Fer Infidel Lo Facebook

Enn fam demenaz 39 an ek res Rivière-du-Rempart inn violaman agrese par so mari, 43 an, Mardi gramatin boner. Arete par lapolis, linn avoue ek explike ki linn sirpri so madam kan li ti pe anvway bann mesaz indesan ek bann foto so aman lo Facebook.

Kan linn dekouver so rol, linn ras so seve. Lalita (prenon modifie) ti pe chat avek so aman lo Facebook Mardi gramatin. A enn moman, so mari, ki nou prenom li Roshan, inn leve. Linn gengn enn sirpriz dezagreab kan linn dekouver ki Lalita ti pe anvway bann mesaz indesan so aman ek pe esanz bann foto. Ankoler, Roshan inn tabas so madam, ziska mem ras so seve.

Lalita inn resi sove avan al port plint stasyon lapolis larezion. Dan so depozisyon, li explike ki li ti pe servi so kont Facebook kan so mari inn leve ek agres li. Linn pran enn Form 58 lapolis ek inn al lopital kot linn resevwar bann swin.

Roshan, arete mem zour ek plase an detansyon, inn avoue saki linn fer. “Mo finn may mo fam anplin. Li ti pe anvway enn lot boug mesaz ek pe anvway foto sipa ki kalite,” li dir bann anketer. “Kouma enn zom kapav aksepte sa ? Lerla mo finn trap li ek bat li.” Dan lazourne Mardi, linn konparet divan tribinal Pamplemousses sou enn sarz provizwar violans domestik. Linn retrouv liberte kondisyonel apre ki linn fourni enn kosyon.

Kontakte par Defi Plus, Lalita inn avoue ki li ena enn aman. “Mo enn fam bati ase lontan, sirtou kan Roshan konsom lalkol ek mo ti nepli kapav siport bann kou,” li konfie. “Depi Aout dernie, monn rankontre enn zom, nou finn sorti ansam ek monn retrouv boner avek li… Sa Mardi-la, monn anvway li mesaz pou dir li mo mari inn mal konport li anver mwa. Monn osi anvway bann mesaz mo bann kamarad ek nou finn partaz foto. A enn moman, Roshan inn leve ek inn kouamns bat mwa.”

Lalita fer resortir ki linn menas pou touy li: “Mo mari inn dir mwa li pou touy mwa ek li pou koup mwa an morso ek li pou al zet mwa dan enn basin kot zame pou retrouv mwa. Mo per pou mo sekirite.” Roshan demanti sa bann alegasyon-la: “Mo finn zis bat li ek pann menas li zame.”

Lanket mene par serzan Seelochun, plase sou soupervizyon sef inspekter Bundhoo.

Loading...

Comments

comments