Aksidan Fatal Laventure: Lapolis Aret Sofer Kamion Ki Ti Anpann

Li ti apel Soorootum Pochonaiken ek ti ena 76 an. Sa abitan Bramsthan-la inn vinn 154e viktim larout. So kamionet inn tap anplin avek enn kamion ki ti anpann lo larout ki al Laventure…

Aksidan-la inn prodwir enn tigit avan 23hr25. Enn fwa sir plas, bann polisie Brisée-Verdière inn konstat dese Soorootum Pochonaiken. Trwa lezot personn ki ti dan kamionet-la inn blese, ladan de byin grav.

Enn tigit plitar, bann ofisie lapolis inn al kot proprieter kamion ki ti anpann-la. Zot inn aret li pou omisid involonter ek inn pas lanwit dan selil polisiyer. Tousala, mem si li ti plas triang pou indike ki so kamion anpann.

“Se enn prosedir normal,” inspekter Shiva Coothen soutenir, depi Police Press Office. “Pou sekirite sofer-la, ti bizin ferm li. Bann pros viktim-la ti kapav pran revanz.”

Tandi bann triang, inspekter Coothen fer rapel ki an ka zot anpann, bizin pran lapen pou plas li ek pou kal li kouma bizin, pou ki li byin vizib ek li pa ranverse.

Comments

comments