Connect with us

Surinam: Saki Enn Polisie Fer Avek Bissoonduth Behari 70 An Sokan Ek Inpardonab

Explik Ou Ka

Surinam: Saki Enn Polisie Fer Avek Bissoonduth Behari 70 An Sokan Ek Inpardonab

Linn port plint kont enn polisie avek National Human Rights Commission ek Independent Commission Against Corruption (ICAC) Merkredi le 20 Desam. Bissoonduth Behari, ki ena 70 an, akiz li pou agres li ek dimann li larzan pou ki zafer-la pa al pli lwin.

Misie-la pa pe kwar saki finn ariv li dan lasware Lindi le 18 Desam. “Mo ena 70 an, zame mo inn gengn bate koumsa dan mo lavi,” Bissoonduth Behari dir.

Zom-la, enn planter, alegue ki linn gengn bann kou avek enn polisie afekte stasyon lapolis Chemin-Grenier. “Monn gengn kout tiyo lor mo ledo, mo lazam, mo lebra…,” sa gran dimoun-la dir, ki ankor dan konfizyon par sa polisie-la so reaksyon violan kont li.

Insilte ek bann kou

Li rakonte ki li ti pe zet fey lo enn terin. Boukou kamion salte al devers zot salte laba pou fer ranpli terin-la, li rakonte. “Se akoz samem ki monn dimann permisyon pou zet salte laba. Zot inn dir mwa oui,” li presize. Kan linn trouv sa, vwazin-la, ki enn polisie, inn ankoler. “Linn koumans insilte mwa ek donn mwa bann kou.”

Pa zis sa. Dapre Bissoonduth Behari, polisie inn ‘sezi’ so bann lakle. “Linn ras lakle mo veyikil. Linn answit dimann mwa pou donn li Rs 2000 pou ki li rann mo lakle ek pa al de lavan avek sa zafer-la,” gran dimoun-la afirme.

Bissoonduth Behari avanse ki polisie-la inn dimann ranfor ek ki de lezot polisie inn ariv sir plas. “Enn parmi sa de polisie-la inn dir mwa donn li sa som-la pou fini sa lamem ek rekiper mo veyikil,” planter-la rakonte. Linn dakor ek linn pran enn motosiklet prete pou al kot li pou pran kas ek vini. “Mo pann dir mo lafami naryin par per ki sa agrave,” sa papa trwa garson-la konfie.

Plitar dan lasware, linn al lopital kot linn resevwar enn Form 58. Merkredi, linn al port plint avek National Human Rights Commission pou bann akt violans ki linn viktim ek avek ICAC.

Kontakte pou enn reaksyon lo sa zafer-la, inspekter Shiva Coothen pann swete fer oken komanter. “Ena enn instans ki okip sa bann kalite zafer-la. Les bann-la fer zot lanket,” linn deklare.

Comments

comments

Continue Reading
You may also like...

More in Explik Ou Ka

To Top