Jin Fei: Shariff Gengn Trwa Kout Kouto Lo Latet

Linn gengn extra per sa zour-la. Shariff, enn sekirite ki ena 63 an, afekte lo enn santie dan Jinfei, inn agrese kout gourdin Vandredi dernie par enn voler lor so plas travay. Sekirite-la pann les li fer ek agreser-la inn donn li trwa kout kouto lor so latet avan sove avek moniter kamera sirveyans.

Shariff inn tromatize. Sa abitan Plaine-Verte-la dir li pe viv dan freyer. Depi de mwa li pe travay kouma gardyin lo enn santie dan Jinfei. Vandredi le 22 Desam ver 5hr45, li ti lor so post travay kan enn dimoun inn apros li. Linn dir li linn trouv enn voler pe kokin kab kwiv andan. Alos linn dimann li pou al guet enn kou. Sekirite-la inn al guete trankil ki pe deroule. Li pann trouv personn ek linn repran so post travay. Se sa moman lamem ki dimoun-la inn pran enn gourdin ek inn agres li violaman.

Shariff pann les li fer ek inn fer rezistans. So agreser inn tir enn kouto depi so pos ek agres li trwa kout lo so latet avan pran moniter kamera sirveyans sove. Sekirite-la inn donn deskripsyon so agreser avek lapolis.

Apre ki voler-la inn sove, Shariff inn alert so patron kinn fer lapolis Terre-Rouge mande sir plas. Bann polisie-la inn transport sekirite-la lopital SSRN, Pamplemousses, kot linn resevwar bann swin avan rant lakaz kot li.

Frison

Kan inn rankontre li so lakaz, sekirite-la touzour dan enn leta sok ek dir li ti kwar so dernie ler fini vini. Medsin inn dir li ki bann kou linn resevwar ti kapav pli fatal si li ti pli violan. “Sa fer mwa gengn frison,” sekirite-la dir. Li panse ki voler-la, apre ki linn esay kouyonn li lo enn fos lapist, inn swazir pou agres li. Linn sove avek moniter kamera sirveyans pou evit idantifie li.

Gardyin-la inn lans lapolis enn lapel pou fer plis patrouy dan sa rezion-la sirtou akoz lane pe koste. Li avoue linn sape. “Mo remersie Bondie ki linn sap mwa. Mo lafami inn byin afekte kan zot inn aprann ki voler-la inn agres mwa violaman. Mo swete ki sa dimoun-la arete pli vit posib avan ki li fer lezot viktim,” Shariff dir. Lapolis inn deza examinn plas vol-la ek inn efektie bann releve lanprint.

Comments

comments