Aksidan Fatal Caudan: “Nou ti dir Ramdass pa al travay,” So Nies Rakonte

“Tou dimoun ti pe kriye li ‘papi’. Nou ti dir li pa al travay azordi akoz move letan me kan mem sa, linn ale akoz li enn anplwaye responsab,” nies Ramdass Poliah, 55 an, konfie.

Sa abitan Britannia-la inn desede dan enn aksidan larout kinn arive lor otorout pre avek Caudan azordi, Zedi le 4 Zanvie, ver 04hr30.

“Li ti enn zom respektab dan Britannia. Zame li ti pe ezite pou ed enn dimoun kan bann-la tap so laport. Se trist pou perdi enn zom kouma li. Li mem ti pli gran dan lafami ek nou pena oken mo pou dekrir kouma li ti ete,” nou interlokitris dir, avek enn lavwa feb avek emosion.

Viktim-la, ki ti pe travay kouma anfle, ti dan enn kamion Omnicane ki ti pe sarye sarbon.

Pwalour-la inn kit Port-Louis ek ti pe diriz ver Reduit kan linn ranverse oter Caudan. Anfle-la inn desede sir lekou ek inn transport sofer kamion-la lopital pou bann swin.

Lapolis inn ouver enn lanket pou determinn sirkonstans exak sa aksidan-la.

Comments

comments