L’Escalier: Gengn Gandia, 500 Lagrin Ek Kas Kot Yovan David Chavrimootoo 26 An

Yovan David Chavrimootoo, 26 an, inn pas reveyon deryer baro. Sa anplaye enn lotel dan Au Morne, ki soupsone pou enn dealer dan larezion L’Escalier, inn apreande par Anti-Drug & Smuggling Unit (ADSU) Southern Division pandan enn operasion mene par serzan Boodhun ek so lekip.

Plis ki 13 gram gandia, anviron 500 lagrin gandia ek enn som larzan inn sezi. Bann limie inn gengn informasion ki enn Maintenance Officer enn lotel ti pe viv enn lavi extraordiner dan larezion. Zot inn desid pou efektie enn travay sirveyans avan pas a lofansiv zour Saint-Sylvestre.

Se ver 5hr, Dimans le 31 Desam, ki bann azan Southern Division inn debark kot Yovan David Chavrimootoo lari Koyratty, Camp La Hache, L’Escalier. Sispe-la ti ankor lor lili kan l’ADSU inn koumans perkizisionn so lakaz.

Bann zom serzan Boodhun inn met lamin lor kat poulia gandia, bann rezidi gandia lor enn fey papie ek bann sase an plastik, 62 sase ki pou servi pou roul gandia ek bann ekipman pou lavant sa sibastans-la.

Pandan lafouy, l’ADSU inn egalman dekouver 498 lagrin gandia. Enn som Rs 700 inn osi retrouve pre kot atiray ki servi pou trafik gandia. Bann polisie soupsone ki sa larzan-la sorti depi lavant gandia.

Yovan David Chavrimootoo inn konparet divan tribinal Souillac Merkredi le 3 Zanvie sou enn akizasion provizwar pou trafik ladrog. Linn rekondwir dan selil polisiyer ziska so prosin konparision lakour.

Comments

comments