Li Koup Lagorz Enn Reunionnais: Marie Hélène “Nou ti pe gengn relasion ek linn rod agres mwa”

Ti ena enn sen byin rar dan Dockers Flats ki trouv Baie-du-Tombeau yer, Vandredi le 5 Zanvie. Bann polisie an sivil inn anserkle enn parmi bann imeb avan perkizisionn enn apartman.

Se lamem, dapre bann ranseignman ki bann limie Northern Special Squad inn gengne, ki Marie Hélène None, enn resortisan Malgache ti trouv refiz. Li ti reserse par lapolis apre ki li ti trans lagorz Bernard Emilie, enn resortisan Reunionnais 52 an. Agresion-la ti arive dan Grand-Baie Zedi le 28 Desam.

Enn diskision inn eklate ant zot ek Marie Hélène None inn pran enn cutter avan agres Reunionnais-la. Viktim-la, ki ti prevwar pou retourn La Reunion lasemen prosen, retrouv li aktielman dan enn klinik dan Grand-Baie. Swit a sa agresion sovaz-la, resortisant Malgache-la inn disparet dan lanatir.

Kan bann zom serzan Arnasala ek bann polisie Baie-du-Tombeau inn fer enn landing dan Baie-du-Tombeau, zot inn sirpri resortisant Malgache-la pe promene dan koulwar enn parmi bann imeb-la.

Plase an eta darestasion, linn remet a bann limie Criminal Investigation Division (CID) Grand-Baie. Marie Hélène None inn konfie avek bann anketer ki zot ti pe gengn relasion sexuel ek sa inn mal tourne. Enn diskision inn eklate ant li ek resortisan Reunionnais-la. Li dir ki misie-la inn esay agres li. Se akoz samem linn defann li mem.

Marie Hélène None inn prezant divan Bail and Remand Court (BRC) azordi, Samdi le 6 Zanvie.

Comments

comments