La-Tour-Koeing: “Mo mari bat mwa kout sintir ek trangle mwa”

Sa abitant La-Tour-Koeing-la dir li pe viv enn veritab martir ant lamin so mari. Li ena 33 an, li alegue ki so mari inn bat li kout sintir avan esay etrangle li avek sa.

Linn port plint stasion lapolis La-Tour-Koeing Zedi le 11 Zanvie kont so mari ki ena 32 an. Madam-la rakonte bann anketer ki li ti dan so lasam dormi kan enn diskision violan inn eklate ant li ek so mari.

Mari-la soupsone ki so fam pe antretenir enn relasion extrakonzigal. Sispe-la inn alos pran enn sintir pou bat li. Prezime viktim explike ki so mari inn answit pous li kont enn larmwar.

So belmer inn vinn ed li. Plinyant-la, par laswit, inn alert so bann pros, kinn vinn rekipir li depi lakaz so mari. Avan ale, madam-la inn anvi amen so garson 10 an avek li. Me so mari inn menas pou touy zanfan-la si li fer sa. “Si fale mo met li dan kouvan ou mo zet li dan pon Grande-Rivière me mo pa pou donn twa zanfan-la,” linn dir so fam.

Sispe-la inn arete par lapolis ek plase an detansion. Linn konparet divan lazistis yer, Vandredi le 12 Zanvie, pou ‘domestic violence’. Linn pled koupab ek inn gengn enn lamann Rs 1 100.

Loading...

Comments

comments