Dram La Prairie: So Pasion Pou Lapes Kout So Lavi

Fin trazik pou Goind Sooreea, 49 an. Sa abitan Chemin-Grenier-la ti al lapes avek so garson 15 an La Prairie yer, Merkredi le 31 Zanvie, kan so pirog inn savire. Inn resi sekourir miner-la me so papa inn perdi lavi.

Viktim-la, enn pasione lamer ek lapes, inn kit so lakaz 5hr dimatin. “Li ti ena labitid pou al lamer, me sann fwa-la, li finn gengn bann problem,” so bofrer rakonte.

Enn gro vag inn savir so anbarkasion. Goind Sooreea inn tonb dan dilo avek so garson. Sa kolezyin Grade 10-la (ex-Form IV) konfie ki so papa inn dimann li pou remonte ziska brizan. Tou le de ti pe naze kan a enn moman done, papa-la inn disparet. Bann peser ki ti pre inn port sekour miner-la. Zot inn ramen li ziska later.

Lapolis Bel-Ombre ek bann eleman National Coast Gard (NCG) inn averti.

Apre 20 minit resers, lekor Goind Sooreea inn repese par Quick Reaction Group South depi NCG, mene par kaporal Dosonyee sou sipervizion asistan sirintandan lapolis Reddy.

Goind Sooreea, ki ena enn patisri koste avek so lakaz, ti byin popiler, dapre so bann pros. Li les deryer li so mama ek de lezot garson ki ena 17 ek 20 an. So bann fineray inn prevwar pou azordi, Zedi le 1er Fevrie.

Loading...

Comments

comments