Aksidan Fatal Goodlands: Nilesh Purdassy 24 An Mor Sir Lekou

Larout inn fer so 12e viktim azordi gramatin boner, Samdi le 3 Fevrie. Nilesh Purdassy, enn abitan Petit-Raffray, ki ti ena 24 an, ti pe diriz ver Goodlands dan so fourgonet kan aksidan-la inn prodir. Se kan li ti pe esay double enn kamion ki so veyikil inn rant an kolizion avek kamion-la. Zen zom-la inn mor sir lekou.

Sofer kamion-la, enn abitan Mapou, ki ena 35 an inn kondir stasion lapolis Goodlands kot linn interoze. Enn lanket inn ouver.

Yer, se Brisée-Verdière ki finn teat enn dram. Kunalsing Panray Ramchurn, pli koni kom Vikesh, 21 an, inn desede swit a so bann blesir swivan enn aksidan larout. So motosiklet inn rant an kolizion avek enn fourgonet alos ki li ti pe retourne depi enn laboutik. Li ti al laboutik-la pou aste enn bwason gazez.

Lotopsi pratike par Dr Sudesh Kumar Gungadin, sef departman mediko-legal lapolis, ek Dr Prem Chamane, Police Medical Officer, inn atribie dese zen zom-la a bann miltip blesir.

Sofer fourgonet-la, enn abitan Caroline, Bel-Air-Rivière-Sèche, ki ena 49 an inn fer enn lalkol test kinn revel negatif. Enn akizasion provizwar omisid involonter inn retenir kont li.

Bann paran Vikesh, ki andeor Moris, pou rant dan pey sa wiken-la.

Comments

comments