Montagne-Blanche: Lekor Enn Zom 25 An Repese Dan Enn Bassin

Li ti porte mankan depi Vandredi le 2 Fevrie. Ek dan lapremidi azordi, Dimans le 4 Fevrie, lekor san lavi Ken Jean Mathieu Angeline inn repese dan enn basin ki trouv Morcellement Sans-Souci, Montagne-Blanche.

Sa abitan cite EDC Caroline-la ti ena 25 an. Li ti al lakaz so ser dan enn sase ki trouv dan Morcellement Sans-Souci. Depi sa, zen zom-la pa finn donn oken sign devi.

Azordi touzour, bann eleman National Coast Guard inn port sekour a enn zom dan Trou-d’Eau-Douce. Li apel Rengarajen Ramparsad. Sa resortisan Indien-la ena 29 an ek li ti pe loze dan lotel Calodyne. Li ti an vakans dan Moris. Li ti pe fer lamars anba dilo. Me a enn sertin moman linn retrouv li an difikilte. Linn kondir lopital Flacq. Me ti tro tar. Bann medsin inn konstat so dese.

Lekatonb pe kontinie. An efe, Mardi le 30 Zanvie, lekor san lavi Preetam Mungra, enn teknisyin Central Electricity Board ti retrouve dan enn lariviyer dan Eau-Coulée. So landimin, pli presizeman dan lapremidi Merkredi le 31 Zanvie, trwa zom inn perdi lavi. Going Sooreea, 49 an, inn desede dan La Prairie, Sookracharya, 49 an, inn desede dan Blue-Bay ek Javis Namjaud, 17 an, inn desede dan Rivière-des-Créoles.

So landimin, Zedi le 1er Fevrie, se Bruno Botterave, enn abitan Riche-Terre ki ena 25 an, inn trouv lamor dan Trou-aux-Biches. Mem zour, Stacy Germain ek kopin so gran ser inn rann lam dan lagon Baie-du-Tombeau.

Ek azordi gramatin, lekor Ritish Bundhoo, 14 an, inn repese dan Île aux Aigrettes. Lapolis ti pe soupsonn enn foul-play akoz adolesan-la ti port bann blesir lor so lekor.

Loading...

Comments

comments