Grand-Baie: Saki Bann Voler Fer Avek Enn Franse Inpansab Ek Revoltan

Linn retrouve inkonsian lor koltar dan Grand-Baie. Sa resortisan franse-la, ki ena 51 an, inn agrese ek zot inn kokin so veyikil Dimans le 4 Fevrie. Yer, Mardi le 6 Fevrie, 4×4 sa abitan Bain-Boeuf-la inn intersepte dan Grand-Bois.

Lapolis inn interpel okipan veyikil-la, kinn sanz plak nimero orizinal kont enn fos. Li dir ki li pann kokin masinn-la. Linn explik bann anketer ki se so frer kinn donn li 4×4-la. Zom-la aktivman reserse par lapolis.

Samdi le 3 Fevrie, resortisan franse-la ti al enn pib dan Grand-Baie. Linn bord so masinn, enn Ford Ranger kouler gri metalize, pre kot enn restoran lokalite. Kan linn retourne depi pib-la, linn diriz li ver so 4×4 kan linn resevwar enn kou lor so figir. Viktim-la inn perdi konesans.

Kan linn gengn konesans, linn konstate ki zot inn kokin so portmone, ki ti ena enn som Rs 4 000, so telefonn portab ek so bann zafer personel. So masinn osi inn disparet sa ler-la. Valer obze kinn kokin estime a anviron Rs 1.5 million.

Resortisan Franse-la inn transporte lopital SSRN, Pamplemousses, par bann polisie. Sa Director of Operations enn sosiete dan Moris inn toutfwa kit lopital kont enn avi medikal, ek sign enn Discharge Against Medical Advice.

Lapolis Grand-Baie pe kontinie zot lanket.

Loading...

Comments

comments