Sezi Rs 9 Millions Gandia: Vwasi Kouma Lapolis Inn Piez Bannla

Operasion inn mene sou kouvertir dan parking Bagatelle Mall. Sa inn fer arestasion de individi, abitan Terre-Rouge ek Plaisance, Rose-Hill, yer, Mardi le 6 Fevrie. 1.5 kilo gandia, pou enn valer marsan Rs 9 millions inn sezi.

Apre ki zot inn pas lanwit an detansion, zot pou konparet divan tribinal Moka azordi, Merkredi le 7 Fevrie. Enn akizasion provizwar trafik ladrog inn retenir kont zot.

Bann ofisie Anti-Drug and Smuggling Unit (ADSU) depi Southern Division inn debark lor parking sa sant komersial-la apre 12hr30 yer. Enn livrezon gandia ti pou deroule. De individi inn arive dan enn veyikil livrezon mark Peugeot. Enn tigit apre, bann polisie sou kouvertir inn revel zot idantite.

Abitan Plaisance, Rose-Hill Laval Désiré Jean François Dominique, 36 an, inn esay sove. Linn metrize apre enn kours pourswit lor enn distans 300 met. Jean Gaëtan Steeve Joli, enn azan antretyin ki ena 40 an, inn sot dan veyikil ki pou so anplwayer. Lapolis inn koumans lasas li.

Ladrog sintetik

Peugeot-la inn terminn so kours apre ki linn tap avek veyikil lapolis ek inn fer plizir tono. Gaëtan Joli, kinn sorti san blese, inn arete. Bann polisie inn trouv gandia dan enn sak ledo.

Inn fer enn landing lakaz tou le de sispe. Bann polisie inn sezi gandia ek ladrog sintetik kot Gaëtan Joli. Trwa poulia gandia inn dekouver dan lakaz Jean François Dominique.

Lanket plase sou sipervizion asistan komiser lapolis Choolun Bhojoo, patron l’adsu.

Comments

comments