Lamor Eddy Ah Kong : “Eddy pa vinn travay pandan plizir zour”

Lekor Eddy Ah Kong inn retrouve koumansman lapremidi azordi, Zedi le 8 Fevrie, dan Cité-La-Cure. Se so bofrer, Joseph Yat Kwan, ki finn fer dekouvert makab-la. Bann sirkonstans otour so dese ankor inkoni.

Eddy Ah Kong ti marye ek ti ena de zanfan. Li ti pe travay lepor. “Sa fer plizir zour ki li pann vinn travay. Pa ti so labitid sa. Li ti kontan fer overtime. Mo bofrer ek so lafami abit La-Tour-Koenig. Isi, se koumandir so deziem rezidans. Li ti pe vinn tousel,” Joseph Yat kwan explike.

Li rakonte ki linn al La Tour Koenig pou gengn nouvel so bofrer. Akoz li pann gengn oken informasion, linn vinn Cité-La-Cure. “Monn dabor dimann vwazinn-la si linn trouv mo bofrer. Answit monn tap laport a plizir repriz. Laport pa ti ferme. Ti ena enn bout plywood divan lakaz-la. Monn rantre ek monn trouv li anba. Monn konpran deswit ki kitsoz pa normal.”

Lapolis ek SAMU inn mande sir plas. Lekor Eddy Ah Kong inn transporte lamorg pou fer otopsi.

Comments

comments